Panchayati Raj minister-in khaw 3 a tlawh

Union minister of state for Panchayati Raj, Nihalchand chuan nimin khan Sairang, Lengpui leh Sihhmui khuate a tlawh a; V/C House, anganwadi centre leh sikulte a fang kual.

Union Minister hian Lengpui, Sairang leh Sihhmuiahte hian khawtlang hruaitute a kâwm a, an harsatna neihte leh an hnawthawh dante a zawt.

Nihalchand hi parliamentary secretary (LAD) K Lalrinthanga, LAD secretary C Thatkunga leh LAD director A Biak­lawma ten an ṭawiawm.

Union minister Nihalchand hi Thawhlehni tlai khan Raj Bhavan-ah Governor Lt.Gen. Nirbhay Sharma nen an inkâwm a; Governor chuan, Mizoram chu Myanmar leh Bangladesh nen ramri inṭawm a nih avangin hmun pawimawh tak a nih thu a sawi a, Mizoramah chuan ziak leh chhiar thiam an tam thu leh tlawm­ngai pawl leh kohhranin khawtlang nun siamṭhatna kawngah an thawh hlawk thu a sawi bawk.

Nihalchand hian Thawhlehni zan khan chief minister Lal Thanhawla chu a bangla-ah a kâwm bawk a; khawtlang inrelbawlna kawnga a bulṭhutte leh Mizorama village council kalphungte an sawi dun a ni.

Union Minister hian nimin chawhnu khan Mizoram chhuahsanin New Delhi a pan a ni.