Pawisa note thai rànte tihtawp tum a ni lo

State Bank of India (SBI) Aizawl Main Branch-a cash officer chuan, pawisa note-a inziak ráng awm a hman theih tawh dawn lo anga thu thehdarh chu thu dik lo a nih thu a sawi a, "RBI aṭangin pawisaa thâi rân dawng lo tura hriattirna kan dawng lo," a ti.

Tun hnaiah Whatsapp leh Facebook velah Reserved Bank of India-in pentui emaw, thil danga pawisaa ziah/thâi rân awm­te chu June 30, 2015 aṭangin a hman theih tawh dawn lo a, tihthih a ni dawn anga thu thehdarh a awm a; hemi chung­chang hi Vanglaini-in a zawtfiah a ni.

SBI Main Branch cash officer chuan, ram dang pawisa, pound, euro, dollar leh a dang­teah pen leh thil danga ziah rân a awm ve ngai lo tih sawiin, "RBI-in pawisa fai leh thai rân loh (clean note) chauh hman ni se a tihna a rei tawh a. Pawisa fai chauh hman a nih theih nan stapler hmanga chilh pawh an remti tawh lo a, bank leh office-a thawkte reng rengin pawisa an chilh tawh ngai lo," a ti.

SBI cash officer sawi danin, pen emaw, thil dang emawa ziah rân pawisa an dawnte chu hman chhuah tawh loh tur­in bank-a thawktute'n an hrêng nghal a, 'non-issue' tih seal chhuin an dahṭha a, RBI-ah an thehlut ṭhin.

Pawisaa ziah hnawk leh thâi rân chu phal a ni lo hrim hrim a, hman theih loh tur anga thuthang awm erawh chu thu dik lo a nih thu cash officer chuan a sawi a, "Dictator emaw, sipai rorelna hnuaia awm ang maia pawisa tihthih thut thut hi India ramah a thlen an rinawm loh. Pawisaah hian ziak ráng lo ila, ram dang mite pawhin an ziah rân loh chu keini pawhin kan ti ve thei ang," a ti.