Solar energy siam theih beisei

Power & Electricity engineer-in-chief L Pachuau leh Aquatics Association of Mizoram (AAM) hruaitute chuan June 16, 2015 khan Serlui ‘B’ Hydel Project-ah an tlawh. L Pachuau chuan, Serlui B tuikhuahah ni chakna hmangin kawlphetha megawatt khat vel siam theih a beisei thu a sawi.

L Pachuau chuan, Serlui tuikhuah chungah solar energy khawl bun theih a nih thu sawiin, chuta ṭang chuan kawlphetha megawatt khat aia tam an siam chhuah theih ngei an inbeisei thu a sawi a, "Solar energy siam chungchang hi Mizoram sorkar hotute hnenah thlen phawt a ni ang a, pawm a nih chuan Central sorkarah DPR siam a ni ang... Tun hnai khan SE Laldela Sailo chu Gujarat-ah solar energy siam zirtir a ni," a ti.

P&E E-in-C leh AAM hruaitute chuan Serlui-B HEP tuikhuaha lawng inkarsiak leh tuihleuh chi hrang hrang tih theih a nih leh nih loh an zir chiang nghal a; water sport neih theih ngei an beisei thu AAM president JK Dawngzuala chuan a sawi.