KHAWTHLIR

Basketball court tur ram pe
Venghnuai branch YMA chuan June 16 zan khan YMA Day an hmang a; he hunah hian Laltlanthangi Pachuau-te chhungkua chuan a pasal RS Rosangluaia leh a fate boral tawhte hriatreng nan Venghnuai YMA hnenah basketball court siamna tur ram an pe a; YMA president KC Lalrinmawia hnenah lehkha pawimawhte a hlan. Basketball court tur ram pek hi sq.metre 1012.38-a zau a ni.

Scooty sem
Cooperative Societies NFDB hnuaia sangha khawitute hnenah nimin khan Fisheries minister Dr BD Chakma-in scooty 100 leh sangha vûr báwm, Rs. 12,000 man ṭheuh Tourist Lodge, Chaltlangah a hlan.

Thawktu tur la
MPSC chuan nimin khan Health department-a contract basis-a thawk tur eye bank counsellor lakna result a tichhuak a, Grace Saihlupuii Sailo, Kanan Veng a tling. School Education department-a lecturer (physics) contract-a thawk tur laknaah R Lalremtluanga, Ramhlun South a tling bawk.

MJA Library pe
MJA Public Library tan Lallunghnema'n a lehkhabu buatsaih, 'Consumer puitu' tih bu hnih a pe a; Jangkhongam Doungel-a'n a lehkhabu ziah 'Lai chieftainship and its impact in politics' tih bu khat leh, Jagadish K Patnaik-a'n a lehkhabu buatsaih 'Socio-Economic Development and Governance in North Eastern Region of India' tih bu khat an pe bawk. MJA chuan lehkhabu petute chungah lawmthu a sawi a ni.

Sipai officer thar
Lalremruata Ralte s/o Lalthanzuala Ralte, Mission Vengthlang chu June 13, 2015 khan Indian Army-ah commission officer-in a lut a, Lieutenant-ah a ṭan. Lalremruata Ralte hian National Defence Academy, Pune-ah basic military training a zo a, Indian Military Academy, Dehradun-ah Post Graduate Diploma in Defence Studies a zo leh a ni.

Bru-te inlan lo
June 15, 2015 aṭanga Tripura Khakchangpara camp-a Bru-te Mizorama kir tura endik tumnaah nimin thleng khan Mizorama kîr tumin inenfiahtir an la awm lo.