Inthlana a hranpaa seat hauhsak ngai lo Hmeichhe politician an awhawm - CM

Chief minister Lal Thanhawla chuan state dangah chuan hauhsak (reservation) vang ni loa politics-a hlawhtling hmeichhe tam tak an awm tih sawiin, "An awh awm hle a ni," a ti.

Mizoram State Com­mission for Women (MSCW)-in nimina I&PR auditorium-a 'Legal Awarness Semi­nar on Domestic Vio­lence an Women in Poli­tics' tih an buatsaih a hman­puinaah thu sawiin Lal Thanhawla chuan, "A bik takin kan party chuan Assembly House-ahte hian hmeichhia a mawi tawk awm ve thei se kan duh mah se, Mizo mipui rilru sukthlek avangin tih theih a la ni lo," a ti a, Assembly inthlanah reservation vang ni loa, an phu vang renga hmeichhe candidate awm thei se duhthusam a nih thu a sawi.

Chief Minister sawi danin, Assembly-a hmei­chhe tana seat reser­vation siam chu an party-in duh mahse, sorkar laipui thu­neihna a nih avangin state-in ama thua a tih ngawt theih a ni lo. Hemi chungchang hi sawi hlawh ṭhin mah se, Par­liament-ah ngaihsak a hlawh lo a ni.

Politics chu zuam awmin lang mah se, hlawh­tling tur chuan politics bela chhum hmin nih ve a ngai tih sawiin Lal Thanhawla chuan, "Offi­cer ṭhenkhat an pen­sion hnuah politics-ah an zuang lut ṭhin. Mah se, heng zingah hian thui tak thleng an vang hle. Hei hian politics bela chhum hmin pawimawh zia a tilang chiang a ni," a ti.

Chief Minister chuan sorkarna an chan hnuah Aizawl Municipal Coun­cil leh village council ah hmeichhiate tan reser­vation an siam tih tar­langin, hei hian Assem­bly inthlan leh hunah hmeichhiate tan kawng ro a sut a beisei thu a sawi.

Khualzahawm, Social Welfare minister PC Lalthanliana chuan, "Po­litics-ah chuan hnung­zuitu ṭha tak leh member ṭha nih hmasak a ṭul a, hmanhmawh chi a ni lo. Mipa hlawhtling tak phena mi pawimawh tak in ni tih hmeichhiate hian in hriat a ṭha," a ti.

Workshop hi MSCW chaiperson Vanlal­awm­puii Chawngthu-in kai­hruaiin, MSCW member Sylvie Z Ralte-in, 'Hmei­chhiate zahawmna leh dan in a humhalhna' tih leh MSCW member Dr. Zokaitluangi'n 'Women in Politics' tih thupui hmangin paper an present a, hei hi sawiho a ni.