MZP-in eiru lo ber thlan an tum

Mizo Zirlai Pawl (MZP) chuan Mizo politician leh gazetted officer zingah eirukna leh hlemhletnaa fihlim ber thlan an tum. MZP hruaitute chuan nimin khan Aizawl Press Club-ah thuthar thehdarhtute kâwmin, eiruknaa fihlim thlan an tum dan an puang a ni.

MZP president Lalhmachhuana chuan, Mizorama eirukna leh hlemhletna hriat tur a awm fo chu pawi an tih thu sawiin, "MZP thil tumah ‘Eirûkna leh hlemhlêtna do’ tih a awm angin, eirukna leh hlemhletnate do a, ûm bo a nih theih nan Lokayukta Mizorama din a nih theih nan nasa takin hma kan la a ni," a ti a; MZP hmalakna avangin kum 2014 kum tawp lamah Mizoram Assembly-in The Mizoram Lokayukta Act a pass niin a sawi.

Lalhmachhuana chuan, Mizo politician leh officer zingah eiruknaa fihlim lo tam tak an awma hriat a nih rualin, eiruknaa fihlim, mi dik leh rinawm tak tak ṭha­hnem tak an awma an hriat thu a sawi a, "Hlawh phû loa hausate kan ngaisang lo ṭan a, mi rinawm leh dikte chawimawi an nih a, ṭhangtharte'n mi dik leh rinawm ngaihsan nacháng kan hriat zel theih nan politician leh officer zinga eirûknaa fihlîm ber thlan kan tum ta a ni," a ti.

MZP President sawi danin, politician leh officer eiru lo thlang tur­in chanchinbu mite leh vantlanga mi challangte thawhpuiah sáwmin, Sub-Committee an siam a, June 22, 2015-ah a hawnna inkhawm neih an tum.

Eiruknaa fimhlim ber thlan tur­ah Mizo politician-ah chuan, MLA ni tawh, tuna la damte aṭanga thlan tur a ni a; officer chu gazetted officer, tuna la thawk mekte aṭangin thlan tur a ni.

A thlangtu tur zing­ah NGO-a office bearer chin, gazetted officer, Mizoram University zirlai, Mizoram Law College zirlai, sorkar pisaa cashier leh accountant, higher secondary school zirtirtu, college zirtirtu leh student union hruai­tu, chanchinbumi, ukil, political party tin aiawh, kohhran hrang hrang aiawh, AMC councillor, bank hnathawkte an tel.