New Market in pui ber him tâwk lo

Aizawl District Disaster Management Authority kaihhruaiin Aizawl district magistrate, engineer, geologist leh Dawrpui Local Council-te chuan nimin khan Aizawl New Market-a building pui ber an enfiah a; mithiamte chuan building chu a him tawk tawh loah an ngai.

Mithiamte chuan, New Market main building chu a sak a ṭhat tawk loh vang leh a hlui deuh tawh avangin a chim palh a hlauhthawnawm niin an sawi a; tun hmain a lo kan tawh bakah, in tinghet turin leirawhchanin a bang pin a ni loh avangin a him tawk lo niin an sawi.

Building chung lama rihna chu a chhawng hnuai lam chaknain a dâwl zo lo theiah an ngai a, a ban leh beam-te chu a hnip tawh hle niin an sawi bawk.

New Market building endiktute hian an thil hmuh dan chu Aizawl District Disaster Management Authority-ah an thehlut ang a, ADDMA-in tih zel dan tur chu a ngaihtuah dawn a ni.