GST Network atana inbuatsaih nan Mizoramin nuai 48 a thawh tawh

Parliament-in chhiah lakna tur dan thar, Goods & Services Tax (GST) Bill a pass tak avangin sorkar laipui leh state hrang hrangte an inbuatsaih ṭan nghal. India rama GST Network kalpuina atan state hrang hrangin sum an thawh a, Mizoram sorkar pawhin cheng nuai 48 a thawh ve tawh.

GST kalpuina tura inbuatsaihna a kal zelah August 8-12, 2016 chhung hian ATI, Kolkata-ah zirhona buatsaih a ni dawn a, state hrang hranga Taxation department
aṭangin mi 45 leh Central Board of Excise & Customs aṭangin mi 15 an tel dawn. Mizoram aṭang chuan mi pahnih an tel ang. Training-a telte hi master trainer tih an ni dawn a, an awmna state-ah ṭheuh training an pe chhunzawm leh dawn a ni.

Taxation department hotute sawi danin, GST kalpui tur hian sorkar laipui chuan ruahmanna a siam lawk tawh a, March 28, 2013 khan GST Network a lo kalpui ṭan tawh.

GST Network hian computer system lam an buaipui ber a, GST network enkawlna atan hian sorkar laipui chuan sorkar laipui leh state sorkarte'n 24.5% ve ve an tum a, financial institution-te'n 51% an tum thung.

GST kalpuina turah GST network chu a
ṭangkai hle dawn a, chhiah pek chungchangah internet kaltlanga tih zel a ngaih tawh dawn avangin sorkar laipuiin a ruahman a ni.

GST network atan hian state tinin sum an thawh a, Mizoram sorkar pawhin kum khatah nuai 48 zel a thawh ve reng tawh bakah, Mizoram sorkara Taxation department hotute pawh a hmunah an zuk kal fo tawh a ni.

Taxation department hotute sawi danin, GST hman a nih hunah chuan, tuna Mizoram aṭanga phaia bungrua leh thil chi hrang hrang lei ṭhinte'n Mizoram sorkara chhiah an pek ang chu tihdanglam a ni dawn.

Phai lama thil an leina hmunah cash memo-in number a nei vek ang a; lei ni, leina zat, registration leh ṭul hrang hrang chhinchhiah a nih hnuah phai lama dawr neitute hnenah chhiah an pe nghal dawn a ni.

GST hnuaia chhiah pek zat chu sorkar laipui leh state sorkar thuneitute'n GST Network hmangin an en vek thei ang.

Bungraw leituin a hralh chhawn lehna pawh kimchang takin computer system-ah an dah lut zel tur a ni a, an leina leh hralhna a inmil thlap a ngai dawn a ni. Hei hian state danga bungraw leina vela chhiah âwl rûkna tur a veng turah an ngai. GST kalpui tur hian state tinin Data Centre an neih vek a ngai dawn a, GST Network nen thlunzawm tur a ni.

India ram puma hmalak a nih mek lai hian, India hmarchhak state te, Himachal Pradesh, Jammu & Kashmir leh Uttarakhand-te chu a hranpain GST Council-in a la ngaihtuah dawn. Mimalin kum khata sum a lak luh zat aṭanga chhiah a pek tur Service Tax pe thei chin pawh bithliah fel a la ni lo nia thu dawn a ni.

GST kalpuina turah hian GST Council din a ni dawn a, Union Finance Minister chu chairman a ni ang a, Union minister of state for Revenue chu member niin, state hrang hranga Finance Minister emaw, Taxation Minister emaw chu member an ni ang. GST Council hian thubuai leh harsatna awmte chu a ngaihtuah ṭhin dawn a ni.