MV Act-a Ownership Transfer hman loh vangin sorkarin sum tam tak a hloh

Mizoram sorkarin lirthei inlei chhâwnna aṭanga chhiah a lak luh theihna dan, Motor Vehicles Act-a Section-5 'Ownership Transfer' a hman loh avangin lirthei lei chhâwnna
aṭanga sum a lak luh theih tur tam tak a hloh mek.

He dan hi hman ni se chuan Mizoram sorkarin sum tam tak a la lut thei dawn nia thu dawn a ni.

Thu dawn danin, Mizorama lirthei zawng zawng zinga hmun thuma ṭhena hmun hnih vel chu inlei chhâwna ngaih a ni a, mahse, Ownership Transfer (OT) hman a ni mang lo.

Kum 1995-a Mizoram Motor Vehicle Rules siamah Ownership Transfer rate lakluh tel a ni lo a, tun thlengin siam
ṭhat a la ni lo.

Central Motor Vehicles Act 1988 siam a nih hnuah kum 1989 khan Central Motor Vehicles Rules siam a ni a; Rules hmang hian state sorkarte'n an state-a hman tur Rules an siam chuan, lirthei lei chhawn a nih a, sorkarin chhiah a lakna tur seng luh tur a ni.

Mizoram sorkar chuan kum 1995-a Mizoram Motor Vehicles Rules a siamah OT a lak luh loh vang leh tun thlenga siam danglam a la nih loh avangin sorkarin chhiah aṭanga sum a hmuh tur tam tak kum tin a hloha ngaih a ni.

Mizoramah lirthei inlei chhâwn tam hle mah se, OT Rules hi sorkarin a kalpui ṭhat loh avangin Traffic police-te leh Transport department-te pawhin he dan bawhchhia hi an man ngai lo. Aizawlah ringawt pawh chanchinbu leh social media-a lirthei chi hrang hrang zuar kuala hralh leh lei hmuh tur a tam hle a ni.

Thu dawnnain a sawi danin, Mizoramah OT Rules hman ni ta se, Mizoram sorkarin kum khatah cheng nuai 26 vel chu lak luh theih tura ngaih a ni. Transport department chhinchhiah danin, tunah hian Mizoramah lirthei 1,50,000 chuang a awm.

Hetih lai hian, Traffic police hotute chuan, lirthei chhar an kawl chángin chanchinbu leh TV-ah a neitu zawnga an thehdarh viau hnuah a neitute'n an lam ngam ngai tawh meuh lo niin an sawi a; an lam loh chhan hi traffic police-te'n document an lo phût ṭhin vanga chhiah chawi tur a tam tawh vang niin an sawi bawk.