Bairabi rel station-ah ILP checkgate hawng

Bairabi rel chawlh-hmunah August 5, 2016 khan Inner Line Permit (ILP) endikna tur checkgate hawn a ni a, thawktute an duty ṭan nghal. Checkgate atan hian rel chawlhhmuna in pakhat hman a ni.

ILP checkgate hawng-tu Kolasib DC H Laleng-mawia chuan, ILP chu Mizorama hnam dang an luh dâlna tur a ni lo tih sawiin, "ILP hi Mizorama lo lut turte'n permit/pass nei se tihna mai chauh a ni. ILP hi mi tam takin India dan pui kalh a ngaiin tihtawp tum ṭhin mah se, India danpui a kalh lo a, Mizote hnam dangte'n min chîm ral mai lohna tura duan a ni. Tunah hian state tam tak chuan neih ve an duh tawh zawk," a ti.