KHAWTHLIR

Thisen pe

Inrinni khan Pangzawl bial ṬKP chuan Christian Hospital, Serkawn tan thisen unit 88 an pe a, a petute mipa 70 leh hmeichhia 18 an ni. Vaivakawn Vengthlang branch KṬP-in Aizawl Civil Hospital tan unit 25 an pe a, a petute mipa 23 leh hmeichhia pahnih an ni a; Bethlehem Venglai North branch KṬP pawhin Synod Hospital tan unit 17 an pe a, a petute kohran mipa 16 leh hmeichhia pakhat an ni.

Tui tla hmu

August 2, 2016 tlai dar 3 vela Tlawng lui Nghalchawm kâia tla hlum, Lalherliana (35), Hunthar Veng ruang chu Inrinni zing dar 9:30 vel khan hmuh a ni. Hun-thar Veng branch YMA president Rohmingthanga sawi danin, Lalherliana ruang an hmuhna hi a tlakna aṭanga lui mawng lam metre 800 vela hlaah a ni.

Thenzawlah zu man

Thenzawl Farm Veng branch YMA leh Thenzawl police-te chuan August 5, 2016 tlai dar 5:30 vel khan an veng chhunga Thenzawl-Lunglei World Bank road-a nepnawi dawr pakhat aṭangin sapzu ûm puitling 10 leh beer can nga an man a; a bul lawka in pakhat aṭangin rakzu fûn 20 an man bawk.

CL Rema vui

Mizo zinga IAS-a tling hmasate zinga mi, Rev.Dr CL Rema chu Inrinni khan Chanmari, Aizawlah an inah vui a ni. Rev.Dr CL Rema hi August 3, 2016 zanah Shillong-a an chenna inah a thi a ni. BCM chuan thuchhuah siamin, CL Rema chu Pathian rawngbawltu ropui leh Mizoram leh India ram tana mi ṭangkai leh thawh hlâwk a nih thu leh an sûn thu an tarlang.

Ceiling chim vangin thi

Inrinni tlai khan Saron Veng Indoor Hall sak mekah celling siam lai a chim a, ceiling siamtute zinga mi Vanneihkima, Bethlehem Veng chu damdawi-in thlenpui a nih hnuah a thi. Lalfakmawia, Bethlehem Veng leh Lalhriatpuia, Chite Vengte an hliam bawk.