RT-PCR khawl bunna tur enfiah

Lunglei District High Powered Committee (HPC) vice chairman Lawmawma Tochhawng, MLA leh Lunglei South bialtu MLA Dr K Pachhunga te chuan nimin khan Lunglei Civil Hospital (LCH)-a RT-PCR khawl bunna tur hmun an enfiah.

MLA pahnihte chuan, Covid-19 do kawngah an district mamawhte sorkarin rang takin a ruahmansak ṭhin nia sawiin, lawmawm an tih thu an sawi a; Covid-19 donaa theihtawp chhuahtu hrang hrangte leh mipui chungah lawmthu an sawi rualin, sorkarin kaihhruaina a siamte ṭha taka zâwm turin mipui an chah.

LCH enfiahnaah hian OPD complex hnung lam, ram ruak chu RT-PCR khawl dahna tur in sakna atan sorkarah rawtna thehluh an rêl a; chu lai hmun chu lirthei tlàn luh theihna a nih bakah, damdawi-in nen innêkchêp loa in dang sak theihna a ni. Doctor-te chuan RT-PCR khawl dahna atan a him thu an sawi bawk.

RT-PCR laboratory building sakna tur hian estimate siam nghal tura tih a ni a, sorkar hotute hnenah thlen a ni ang. MLA-te hi LCH medical superintendent Dr SR Ngurchamliana leh a thawhpuite'n an ṭawiawm a ni.

Sorkar thuchhuah tarlan danin, Covid-19 hrileng dona atana hmalakna kal zelah LCH-a RT-PCR khawl bun a nih theihna turin ni 15. 8. 2020 ah Health minister Dr. R. Lalthangliana kaihhruaina hnuaiah enfiah a ni.

Tun dinhmunah chuan RTPCR khawl hi hospital building chhunga dah mai theih anih loh avangin Lawmawma Tochhawng, Dr K Pachhunga leh Medical Superintendent chu RTPCR khawl dahna tur LCH compound leh hmun remchang dangte lo en a, ruahmanna lo siam turin sorkarin a rawn ruat a ni