Khaw 28-ah kawlphetha la lut lo

Power & Electricity department-a Lungsen Sub-Division hnuai-ah tun dinhmunah kawlphetha la luh lohna khaw 28 a awm a; chung zinga khaw 16-ah chuan hmalakna a la awm lo nia thu dawn a ni.

Thu dawn danin, thingtlang khaw tin tihên vekna turin sorkar laipui chuan scheme pakhat, Rajiv Gandhi Grameen Vidyutikaran Yojana (RGGVY) a rua-hman a, kum 2008-ah kalpui ṭan a ni. RGGVY scheme hi Guwahati-a T&T Project Ltd. chuan Mizoram chhim lamah kalpuiin, thingtlang khaw hrang hranga êng pek hna an thawk a; sorkar kum kal ta tawp hmain thingtlang khaw tin tuam chhuah tura tih a ni.

Kum 2008-a RGGVY kalpui a nih hnuah, Lunglei district-a Tlabung, Lungsen leh Chawngte huam chhungah kawlphetha pek tur khaw 124 a awm a, chung zinga khaw 96-ah hna thawk zo tawhin, khaw 28-ah kawlphetha pek a la ni lo a; khaw 16-ah
chuan hmalakna a la awm lo a ni.

Sorkar laipui chuan tun hnai khan RGGVY chu Deendayal Upadhyaya Gram Joyti Yojana (DDUGJY) tiin a thlak a, DDUGJY hmang hian RGGVY hnuaia hnathawhte chu chhunzawm a ni. Rural Electrification Distribution Backbone (REDB) scheme hmangin khaw tin châwmtu tur transformer dah belh hna thawh a ni bawk.