Free wifi kan dah ngei dawn : AMC Mayor

AMC mayor PC Lalhmingthanga chuan inthlan dawna an intiam ang ngeiin Aizawl khawpui chhungah free wifi an dah tur thu a sawi a, "Tun thla chhung hian peih hman kan tum," a ti.

PC Lalhmingthanga hian August 5 khan Mizo Hnam Runah thu sawiin, "Free wifi atan hian thlatin cheng sing chuang sen ngai pawh ni se, mipuia kan intiamna a nih vangin kan ti ngei dawn a, a buaipui turin zirchian ngai eng emaw zat a awm a ni," a ti a, zirchian ngaite an zirchian hnuah free wifi pek chhuah dan tur chu hrualmumin, a hmawr bâwk a nih mêk thu a sawi.

Aizawl khawpui hmun engemawzatah solar energy light vuah a nih dawn thu sawiin AMY Mayor chuan, "Tun atan chuan veng 83-ah hmun 1097 velah dah chhin phawt an tum," a ti.

PC Lalhmingthanga chuan AMC sorkar hmasa thil tih leh hmachhawp mek te chu an chhunzawm tih sawiin, “Hmun hnih-a ‘fly over bridge’ an lo siam te chu ṭha takin kan chhunzawm a, hman theiha thawh zawh tep a ni tawh,” a ti a, traffic táwt tih ziaawm nan motor dahna hmun tur ‘cavern parking’ Chanmari-ah siam tum mek a nih thu a sawi.