Zu zawrh titawp turin tumah ráwn lo ngam rawh se - Tawnluia

MNR senior vice president Tawnluia chuan nimin khan Mizo Hnam Rûna inkhawmah thu sawiin, sorkarin MLPC Act leh zu zawrhin a nghawngte ennawntu tur committee a din chungchangah, "Zu zawrh dáwna tumah ráwn lo ngam chuan zu zawrh titawp turin tumah ráwn lo ngam rawh se," a ti.

Tawnluia chuan, Congress party kaihhruai sorkar chu zu phalrai a, zu rui leh buaina siamte véng hneh leh si loah a puh a, "A vènpui turin phungbawmah tlawmngai pawlte a ṭah-awh leh si hi mualphona satliah pawh a ni lo, suahsual thil tih a ni," a ti a; zu zawrh hnuah MLPC Act hmangin thubuai 2,313 ziah luh a ni tawh tih sawiin, zu zawrh policy hlawhchhamzia entirtu niin a sawi.

MNF-in independent an sual hunlai
aṭang tawhin zu zawrh an duh ngai lo a, an lo khap hial tawh tih sawiin, Tawnluia chuan, "Pu Laldenga hoa kan sorkar khan Congress sorkarin zu a lo zawrh tawh tihtawp kan tum a, mahse, zu zuar permit neite licence a la thi si lo a, an permit a thih veleh zu zawrh kan khap a ni," a ti.

Tawnluia chuan, tun hnaia MNF party-in zu zawrh duh lohna resolution an siam, Chief Minister hnena lehkha an thehluh chu tun thlengin chhanna an la dawn loh thu a sawi a, "A inngaih pawimawh loh thlak a ni," a ti a; MNF chuan mipui hmakhaw ngaia an tih tur an hai loh tur thu a sawi.

MNF Sr. Vice President chuan, North East Democratic Alliance (NEDA) chungchang sawiin, India ram hi Congress party lal inthlah chhâwngin ram retheiah an hruai lut a, hmarchhak bial phei chu an ngaihthah a, min rapbet a, nasa takin min hliam a. Min rapbettute do lêta hneh tur leh hmasawnna, ei leh bara kan intodelh theih nan Congress party do rawna thawkho turin báwm thar a lo piang ta a ni. NEDA hian MNF thupui leh thinlung chhun han khat pawh a tidanglam lo," a ti.

MNF thuchhuah chuan, nimina an party pisaa inkhawmah hian ZNP headquarters secretary an lawm lut niin an tarlang.