Lirthei kum 10 service tawh thlak ṭha ti lo

ZNP president Lalduhoma chuan nimin khan an party pisaa inkhawmah thu sawiin, "Lirthei hmanga eizawngtu eng emaw zatin road tax kum 15 chhung daih an pek tawh laia kum 10 service tawh thlaktir tumna a awm hi a dik lo," a ti.

Lalduhoma chuan, taxi, maxicab leh city bus-te kum 10 chin service tawh thlaktirna hun sorkarin a pek, taxi leh maxicab tan thla ruk leh city bus tan thla riat tih hun chhungin thlakna hun a awm loh thu sawiin, "A thar leina tur nei lo tur an tam avangin ‘Chem loa lu lakna’ a ni," a ti a; lirthei neitute’n fitness/pol-lu-tion certificate an neih chhung chu thlaktir loh ni se a duh thu leh sorkarin a thu sût leha ngaihtuah ṭha leh tura an phût thu a sawi.

Kut hnathawktute thawh rah a thlâwn-in a luang ral mek nia sawiin, ZNP President chuan, "MNF leh Cong-ress kum 30 an sorkar chhungin kut hna-thawktute dam khawchhuahna tur-in sorkarin ruahmanna a siam lo," a ti. Mizorama contract farming hmasa ber red oil palm chingtute'n harsatna an tawk mek nia sawiin, "Ministry of Agri-culture-ah Market Intervention Scheme (MIS) an dilna hnâwlsak an ni. Contract farming ni si, hetianga sorkarin a kalpui hi kan dem a ni," a ti.

Lalduhoma chuan, iskut hralhna man a hniam hle thu leh sorkarin minimum price siamsakin kg. khat Rs. 10 aia hniam lo talin ruahmanna siamsak se an duh thu te; Hnahlan Grapes Growers Society-te'n harsatna an tawh mek thute a sawi bawk.

ZNP President chuan, gas tih-ching-pen man chhuah, phalna nei loa hnam dang sumdawng dap chhuah, ILP leh sorkar phal loh ruihhlo dap chhuah kawnga tlawmngai pawlte hnathawhte a fak a; “Sorkarin a tih theih loh titute chu kan NGO-te hi an ni," a ti.