November 1 aṭanga Bru hruai kîr duh

Mizoram sorkar chuan Tripura refugee camp-a Bru awmte hruai kîr hun atan November 1, 2016 a ruahman a, sorkar laipui thu leh hla an ngaichâng mek.

Home department-a additional secretary Lalbiakzama'n zawhna chhang-a a sawi danin, Bru hruai kîr tur ruahmanna hrang hrang (road map) chu Ministry of Home Affairs-ah thawn a ni tawh. Road map-ah chuan Bru hruai kîr hun atan fûr ruahtui tlak tawh loh hun, kumin November 1 rua-hman a ni. Bru hruai kîr hi ṭum khatah tih a ni dawn lo a, hun hrang hrang ruahman a ni ang.

Bru-te chu hruai kîr an nih chuan Mizorama an awm laia an awmna Assembly constituency-ah dah tum an ni a, hruai kîr turte chu kum 1995 Mizoram electoral roll-a awm leh an thlahte an ni.

Ministry of Home Affairs chuan Bru-te tan hian sorkar laipui, Mizoram leh Tripura sorkar aiawh telna Joint Monitoring Committee din a rawt a, mahse committee hi din a la ni lo.

Hetih lai hian, Mizoram Bru Dis-places People’s Forum (MBDPF) hruai-tute chuan tun hnai khan Ministry of Home Affairs hotute hnenah an thil duh hrang hrangte an thlen a; chu'ng zingah chuan Mizorama an kîr hunah a hlâwm deuha dah khawm an duh thu a tel a ni.