National Handloom Day hmang mek

Sorkar laipuia Directorate of Commerce & Industries leh Weavers Service Centre, Aizawl ṭangkawp chuan nimin khan Vanapa Hall-ah National Handloom Day vawi hnihna an hmang a, Industries minister H Rohluna'n a hmanpui. Day pual hian Handloom Exhibition buatsaih a ni.

H Rohluna chuan, Mizoramah puantah uar zel a ni tih sawiin, "Puantahtute hi kum tin an pun avangin inelna pawh a awm lo thei lo. Chuvang chuan, ti ve mai mai leh hna uluk lote tan hmun a zîm tual tual a, taima taka thawk leh design thar hmuchhuaka kuthnu mámte chu an dingchang mek zel a ni," a ti a; puantahtute chu hma-sawn zel tum turin a chah.

Industries Minister sawi danin, tun dinhmunah Mizoram chhunga puan deh chhuah mekte chu a tam zawk acrylic lâ (yarn) hman a nih avangin hmarchhak state bakah hralh a kal lo a; ram páwn leh khawvel hmun danga thawn chhuak tur chuan natural fiber - cotton, silk leh wool-te hmanga puantah a nih loh chuan ram dangah hralh a kal lo a ni.

Puantahna hnawng mai tur ven dan ngaihtuah turin ‘Handloom Research and Promotion Council’ din tum a nih thu sawiin, H Rohluna chuan, "Chumi bawhzuia tihchangkan nan state sorkarin district hrang hrang huap lawmman award siam a tum," a ti.

National Handloom Day hi Industries secretary Zothankhuma'n a kaihruai a, parliamentary secretary (Industries) Joseph Lalhimpuia pawhin thu a sawi.

Handloom Day pual hian Vanapa Hall-ah hian ni thum awh tur Handloom Exhibition buatsaih a ni a, Industries Minister hian a hawng nghal a ni.