KHAWTHLIR

Thisen pe

Baktawng Pastor Bial KTP-te chuan nimin khan Baktawng Venglai Kohhran hall-ah blood donation camp an huaihawt a, mipa 37 leh hmeichhia pakhat-in Synod Hospital tan thisen unit 38 an pe.

Rângva hlân

MLA Chalrosanga'n a bial, Lunglei West chhunga chhungkaw 20 tana Rural Housing Scheme aṭanga rângva bundle li ṭheuh a pek chu nimin khan a dawngtute hlân a ni a; Lunglei Press Club-a dah tur plastic chair 10 pawh Lunglei MJA president Lianchama Chhangte hnenah hlan a ni.

Award dawng dawn

Police Training School (PTS) Thenzawla CDI inspector Zochama chu Union Home Minister's Medal for Excellence in Police training a dawng dawn. Award dawng tur hi Ministry of Homa Affairs thlan a ni a, medal leh Rs. 25,000 a keng tel.

HSLC exam hun

MBSE chuan HSLC exam hun atan March 2017 a ruat. September 19, 2016 aṭangin form lak chhuah theih a nih thu tarlangin, sikula hotute chu thil pawimawh tifel tura hriattir an ni. Form leh fee thehluh hun hnuhnung chu October 28, 2016 a ni.

Hawrawp zirho

INTACH, Mizoram Chapter chuan nimin khan IPR Conference Hall-ah Pau Cin Hau hawrawp (alphabet) chungchanga inràwnkhawmna an buatsaih. Inrawnkhawmnaah hian Zosapte'n Mizo A Aw B an siam hnua Mizo hnahthlak zinga Pau Cin Hau-in kum 1902-ah a iráwm chhuak hawrawp, Pau Cin Hau alphabet tia koh a siam chu sawiho a ni.

Dincham lawm

Mizoram Police Wives Welfare Association (MPWWA) Serchhip Unit chuan nimin khan SP conference hall-ah an dincham vawi khatna an lawm a, SP Lalringdika'n a hman pui. MPWWA hian miharsa leh ṭanpui ngaite ṭanpuia hma an lak ṭhin bakah police nupuite tan puanṭhui leh beauty culture-te an zirtir ṭhin a ni.