Science lamah theihtawp chhuahin Hma kan la zel ang - Chief Minister

CM Zoramthanga chuan, science-in khawvelah hma­sawnna a thlen thu sawiin, "Science hian hmasawnna ropui khawvelah kan neih zel theihna turin theihtawpin hma kan la ang. Kan scientist leh zirlaite'n hmá sâwn zel se. Pathian hian kan zir zel tur tam tak a la dah a ni. Kan hmabakah tih tur tam tak a la awm," a ti.

Science-in khawvel a tihdang­lam nasatzia mi tinin an hriat vek thu sawiin CM Zorama chuan, "Kan pi leh pute huna lo neih dan leh tunlai dinhmun a hahdamthlak ta hle. Kháwlin chaw min barh lo chauh tawh a ni. Science vangin khawvelah hahdamin hun kan hmang. Kan tana ṭangkai tur zawng chhuak turin Pathianin finna kan thinlungah a dah a, khawvelin a zár a zo a ni," a ti. Zoramthanga chuan, science-in hmasawnna hnathawhna kawngah awlsamna a thlen tih sawiin, "Aizawl leh Lunglei inkar hi sorkar pawisa tel loa bawngtuthlawh leh suahdûr ringawta laih tlang a ni. Tunah chuan kháwlin a lài zung zung a, hnathawh a chak tawh," a ti a; hmasawnna tinréngah science-in hma a hruai thu a sawi.

Science thiamna sang viau tawh mah se, mihringin tih theih loh chin a neih thu sawiin Chief Minister chuan, "Covid-19 in America President aṭangin rethei ber thlengin min hrút a, kan vai tlûk dual mai a ni. Covid-19 léng mek hi Pathianin a tâwk ta a ti dawn nge, a dona tur vaccine an hmu chhuak tawhte an ti a, khawvel scientist ropui berin a hriat chin bak a la tam a ni," a ti. Mizoram Science Congress hawnaah hian Chief Minister hi Planning secretary Dr C Vanlalramsanga leh chief scientific officer Dr RK Lallian­thangate'n an ṭawiawm. Science Congress hman a nih chhungin intihsiakna chi hrang hrang online hmanga buatsaih a ni ang.

Science Congress hawn zawhah Mizoram University leh NIT-Mizorama mithiamte'n physical science, engineering leh information & Technology chungchangte an sawiho a, intellec­tual property right chungchang pawh sawiho a ni. Nizan khan Covid-19 chungchangah special live session neih leh a ni. Vawiin hian khawvel sik leh sá inthlak danglam chungchang leh thupui dang pawimawh tak takte sawiho a ni dawn a; naupang pualin Children Science Expo neih a ni bawk ang. Mizoram Science Congress hi Mizoram Science, Technology & Innovation Council (MISTIC), Mizoram Science Society, Science Teachers' Association Mizoram, Mizo Academy of Science, Biodiversity & Nature Conservation Network, Mizoram Mathematics Society leh Geology Society of Mizoram-te buatsaih a ni.