COVID-19: Mizoram dinhmun Hripui vei 12 hmuh belh a ni

December 2, Nilaini khan Mizoramah Covid-19 vei mi 12 hmuh chhuah a ni a, Mizoram chhunga kái leh state pawn aṭanga rawn lut mi paruk ve ve an ni. Nimin khan mi 55 chhuahtir an ni thung.

Covid-19 vei Nilainia hmuh chhuahte chu mipa 10 leh hmeichhia pahnih an ni a; ZMC laboratory-a hmuh pathum, TrueNAT-PCR hmanga hmuh mi pahnih leh Rapid Antigen Test (RAT) hmanga hmuh mi pasarih an ni.

Nimin khan hripui laka fihlim tawh mi 55 chhuahtir an ni a, Nilaini zan khan BSUP CCC aṭangin mi pariat chhuahtir an ni. Nimina chhuakte chu ZMC aṭangin mi pathum, BSUP CCC aṭangin pakua, Tribal Art Centre aṭangin paruk, Lunglei Pukpui aṭangin pathum, Champhaiah paruk, Serchhipah pakua leh Lawngtlaiah mi 19 an ni.

Mizoramah Covid-19 positive mi 3,881 hmuh chhuah a ni tawh a, mipa 2,862 leh hmeichhia 1,029 an ni. Nimin tlai dar 5 thleng khan mi 3,647 (93.98%) chhuahtir an ni tawh a, mi paruk (0.15%) thi tawhin, enkawl mek mi 228 (5.87%) an awm.

Mizorama Covid-19 positive hmuh chhuah tawh mi 3,881 zinga mi 1,820 chu Mizoram chhunga kái an ni a, mi 2,061 chu state páwn aṭanga rawn lût an ni.

December 2, Nilaini khan Mizoramah swab sample 1,043 endik a ni a, ZMC-ah mi 293, TrueNAT-PCR hmangin district pakuaah mi 217 leh RAT hmangin district 11-ah mi 533 endik a ni. Mi 1,043 zingah Covid-19 positive mi 12 an awm.

Covid-19 positive hmuh thar mi 12-te chu Mizoram chhunga kái leh state páwn aṭanga haw mi paruk ve ve an ni a; natna (Covid-19 symptom) lang chhuak mi pahnih an awm. Tualchhunga kái mi paruk zingah hri kài ṭanna hriat loh mi pali a awm bawk.

Sorkar thuchhuaha a lan danin, ZMC laboratory-a hmuh chhuah mi pathum chu mipa, tun hnaia state pawn aṭanga rawn lut vek an ni a; quarantine facility-a awm laite niin, Covid-19 symptom nei an awm lo.

TrueNAT-PCR hmanga hmuh chhuah mi pahnihte pawh state pawn aṭanga haw ve ve an ni a; quarantine facility-a awm lai, symptom nei lo ve ve an ni.

RAT hmanga hmuh chhuah mi pasarihte chu mipa panga leh hmeichhia pahnih an ni a, puitling vek niin, a upa ber chu kum 81 mi a ni. An zinga paruk chu Mizoram chhunga hri kái an ni a, pakhat erawh chu state páwn aṭanga haw a ni thung.

Tuikhuahtlang - 1: Mipa kum 26, SBI-a thawk, Uttar Pradesh aṭanga rawn lut.

MINECO, Aizawl - 1: Mipa kum 43, Assam aṭanga rawn lut.

Thingsulthliah - 1: Mipa kum 36, Haryana aṭanga rawn lut, Pioneer Transit Camp, Thingsulthliaha awm.

TrueNAT-PCR-a hmuhte:

Tuichawng - 1: Mipa kum 51, Assam aṭanga haw.

Kolasib Saidan - 1: Mipa kum 43, Assam aṭanga haw.

RAT hmanga hmuhte:

Sihphir Venghlun - 3: Mipa kum 37 & 69 leh hmeichhia kum 65. Aizawla damdawi-in pakhata hmuh chhuah, symptom nei lo, Hri kai ṭanna hriat chian loh vek.

Bawngkawn - 1: Hmeichhia kum 48, Aizawla damdawi-in pakhata hmuh chhuah. Hri kaina hriat loh, symptom nei.

Ramthar North - 1: Mipa kum 40, Lucknow, UP aṭanga haw, Lengpui Airport screening point-a hmuh chhuah, symptom nei lo.

Lawngtlai AOC - 1: Mipa kum 81, kaina hriat, symptom nei lo.

Thingkah - 1: Mipa kum 37, hri kai ṭanna hriat, symptom nei.