N. Vanlaiphai VC thlang ṭha dawn

Mizoram State Election Commission (SEC) chuan December 10, 2020 (Ningani) khian North Vanlaiphaiah village council thlan ṭhat tur a nih thu a puang.

SEC tarlan danin, N. Vanlaiphai VC thlan ṭhat turah hian, December 10-ah zing dar 7 aṭanga tlai dar 4 inkarah vote thlak tur a ni a, vote thlak zawhah vote chhiar nghal tur a ni. Inthlan ṭhat a ngaih chuan, a tuk, December 11-ah vote thlak a ni ang a, inthlan kaihhnawih thilte chu December 17-ah zawh vek tur a ni. Inthlanah hian candidate-te chu August 27, 2020-a VC inthlana mite vek an ni ang.

Tarlan tawh angin, N Vanlaiphaiah hian August 27, 2020-a VC inthlanah MNF pali, ZPM pahnih leh INC pakhat an tling a; inthlana tling zo lo ZPM pali, INC pakhat leh independent pakhatte chuan inthlanah thil dik lo a awm nia hriain Election Tribunal-ah complaint an thehlut a ni. Complaint bawhzuiin November 18 khan vote tlate chhiar nawn a ni a, vote hmuh zatah danglamna a awm lo.

Hetih lai hian, complaint thehluttute'n vote thi a tam lutuk an tih chu finfiah turin vote thi ballot paper-te endik tum a ni a, mahse, hmuh tur a awm tawh lo. Hei vang hian Election Tribunal chuan inthlan chu rintlak tâwk lo tiin, SEC-ah report a thehlut a ni.