Taxation dept-in thla 9 chhungin chhiah Rs 8,26,31,66,436 a hmu
Mizoram sorkara Taxation chuan sorkar kum kal mekah April-December 2024, thla 9 chhung khan chhiah Rs 8,26,31,66,436 an hmu. Tuialhthei aṭanga Social Infrastructure & Service Cess leh Road Maintenance Cess a lakah December 2024 thleng khan cheng nuai 452.32 hmuh a ni tawh.
Finance department hnuaia Taxation monthly achievement-a tarlan danin, April-December 2024 chhung khan Taxation-in kau hrang hrang aṭangin chhiah Rs 8,26,31,66,436 an hmu. Chhiah hmuh zinga 84.55% chu Goods & Services Tax (GST) aṭanga hmuh a ni a, Sales Tax aṭangin Rs 1,12,30,72,386 (13.59%) hmuh a ni.
Taxation monthly achievement-a tarlan danin, October - December, 2024 chhung khan Social Infrastructure & Service Cess leh Road Maintenance Cess aṭangin Rs 2,26,16,300 ve ve hmuh a ni a, belhkhawmin Rs 4,52,32,600 a ni.
Tuialhtheia chhiah lak thar pahnihah hian petrol leh diesel litre khatah Rs 2 zel lak a ni a; cess pahnih belhkhawmin nikum October thla khan Rs 16,48,352, November thla khan Rs 4,26,50,312 leh December thla khan Rs 9,33,936 hmuh a ni.
Social Infrastructure & Service Cess leh Road Maintenance Cess aṭanga chhiah hmuhte thla thum chhunga a inthlauh viau chhan Vanglaini palai zawhna chhángin Taxation hotute chuan, cess an lak ṭan tirh lamah tuialhthei company ṭhenkhatin a hunah chhiah an chhûn luh hman loh avangin a thla lehah a lut khawm a, chuvang chuan monthly report-a chhiah hmuh zat a inthlauh thu an sawi.
Taxation hotute chuan, "Chhiah hi a thlabi chat chata data-a kan dah avangin ni khat lek pawhin rawn pe tlai se, report kan siam thlaah khan ziah luh theih a ni tawh lo. Kum tin December-ah chhiah lut a tlem ziah a, January thlaah a pung hluai ṭhin. Nikum December-a chhiah chhûng lut hman lote'n kumin January-ah an chhûn luh kan beisei," an ti.
Tuialhtheia cess chi hnih lak chungchangah hian chief minister Lalduhoma chuan October 17, 2024-a a pisaa thuthar thehdarhtute a kawmnaah, cess lak zawng zawng chu mipui tan an hman vek dawn thu a lo sawi tawh a ni.
Chief Minister chuan, Road Maintenance Cess chu kawng atan liau liau hman a nih tur thu a sawi a; Social Infrastructure & Services Cess chu zirna leh damdawi lam tihchangtlunna atan te, thiamthil tihhmasawnna lama ṭhalaite inzirna hmun tihchangtlunna atan te, women hostel-a thawktu tur lakna atan leh thil dang pawimawhahte hman a nih tur thu a sawi bawk.
Hetih lai hian, Taxation-in tun hmaa chhiah an lâk ṭhin Entry Tax leh Entertainment Tax chu GST kalpui a nih aṭangin GST hnuaiah a awm tawh a; tun thlenga Entertainment Tax-a chhiah lut tarlante chu tun hma aṭanga bá awm, tun hnua lut lehte an ni.
Taxation hotute chuan, Entertain-ment Tax ba chu a luh kim hunah Entertainment Tax-a chhiah lut tarlanna column chu an paih dawn thu leh, Entry Tax-a báte pawh a luh kim tawh avangin a column an paih tawh thu an sawi.