Tribal Affairs Minister-in EMRS a tlawh

Union Tribal Affairs minister of state Durga Das Uikey chuan nimin khan Eklavya Model Residential School (EMRS), Tlangnuam tlawhin, hmunhmate a fang kual a; ram pumah hmasawnna inkhairual a awm theih nan zirna tihhmasawn a ṭul thu a sawi.

Durga Das Uikey chuan, India rama EMRS-te chu zirna tihhmasawnna tura mi tin ban phak leh entawn tlaka kalpui a pawimawh thu a sawi a, "India ram pumah hmasawnna inkhairual a awm a pawimawh a, chumi tihlawhtling tur chuan zirna tihhmasawn a ṭul," a ti.

EMRS chu naupang tam takin zirnaa hlawhtlinna an chhar chhuahna hmuna siam turin thawktute chahin Tribal Affairs Minister chuan, "Zirtirtute hi naupang nun kaihruaitu pawimawh, nun kawng dik leh hlawhtlinna kawng kawhhmuh hna thawktu an ni," a ti a; zirtirtute hna chu hna zahawm leh ropui ber pawla a ngaih thu a sawi.

Durga Das Uikey hi Social Welfare & Tribal Affairs secretary Lalzarmawii leh director Dr R Lalhriatzuali ten an ṭawiawm a; EMRS, Tlangnuama thawktute'n lo dawngsawngin, an hmunhmatye an fan kualpui a ni.

Thawktute tarlan danin, EMRS, Tlangnuamah hian pawl 6 leh pawl 7 zirlai 101 an awm mek a, zirtirtu paruk leh thawktu dang mi 11-te'n an enkawl. In leh hmunhmate satu DJ Consultancy Services-in an peihfel vek lo a, hnathawh tur zinga 95 zo tawh anga chhût niin, March 2025-ah an zawh beisei a ni.

Sorkar thuchhuah tarlan danin, Ministry of Tribal Affairs hnuaiah National Education Society for Tribal Students kaltlangin Sawleng, Khawbung, Khawzawl, West Phaileng, Thiltlang leh Lungsenahte EMRS din tuma hmalak mek a ni a; Aibawk, Thingdawl, East Lungdar, Reiek, Bunghmun, Sangau, Phullen, Champhai leh Bungtlang South-ahte sak belh a nih theih nan ruahmanna siam a ni bawk.