HM-in Online Fire NOC portal a hawng

Home minister K Sapdanga’n chuan nimin khan a pisaah Fire & Emergency Services-in in sak dawna no objection certificate (NOC) dilna a hmun pan ngai loa online kaltlanga dilna thehluhna tur portal a tlangzarh.

K Sapdanga chuan, in sak dawna fire NOC dilna, Fire & Emergency Services office-a kal ngai loa mahni awmhmun aṭanga online hmanga dilna portal siam chu mipui tan a nih thu a sawi a, "Mipui tan awlsamna a ni a, thil pawimawh leh ṭangkai tak a ni dawn," a ti.

Portal tlangzarh tak hi www.fsonline.mizoram.gov.in a ni a, portal siamtu leh buaipuitu chu Information and Com-munication department kutchhuak a ni.

Portal tlangzarhna hi Home secretary Vanlalmawia'n a kaihruai a, Fire & Emergency Services director Lalṭhafamkima Jongte leh Home department officer eng emaw zat an tel.

AMC Regulations, 2012 Clause 5(3)(ix)-in a phût angin Aizawl Municipal Corporation (AMC) huam chhunga metre 15 aia sang in (high rise building) sa tur tan leh National Building Code, 2016 Part IV (Fire & Life Safety)-in building a tarlante tan Fire & Emergency Services department aṭangin Fire NOC neih a ngai a; in san dan tur ruahmanna engkim thehluh tel a ngai a ni.

Fire NOC dilna Fire & Emergency Services-a thehluh hnuah a hmunah endik a ni a, chumi hnuah Fire & Emergency Services-in provisional NOC an pe ṭhin. Mizoram sorkarin a duan angin Fire NOC fee a awm a, residential building atan square metre khatah Rs 1.50 (a tam berah Rs 2,000) leh Non- besidential building atan sq.m. khatah Rs 3 (a tam berah Rs 3,000) lâk ṭhin a ni. Diltute'n in an sak zawhah Final NOC dilna an thehlut leh ṭhin bawk.