Lawngtlai district-ah ráltlân 28 an luh belh

Lawngtlai district-a Assam Rifles-te chuan January 5, 2025 khan Mizoramah Bangladesh aṭanga ráltlân lut mi 28 an awm belh tih hriat a nih thu, raltlante awmna Hruitezawl an thlen nghal thu an tarlang.

Thu dawn danin, Assam Rifles-te chuan December 27, 2024 khan Bangladesh aṭanga raltlan Mizorama luh tum mi 35 chu ramri-ah lo dangin, Bangladesh lamah an kìrtir a, mahse, January 5, 2025 zan khan Bâwm hnam mi 28 chu an rawn lut leh a, Hruitezawlah an awm a ni.

Mizorama rawn lut thar mi 28-te chu Mizoram sorkar leh Lawngtlai Bawrhsap remruat angin Hruitezawla awm rih tura tih an ni a; anmahni en zui turin sorkar laipui aiawhte'n January 7 khan Hruitezawl an tlawh a ni.

Lawngtlai district-ah raltlan mi 8,020 an awm mek a, chu'ngte chu Myanmar aṭanga lut mi 5,922, Bangladesh aṭanga lut mi 2,014 leh Manipur aṭanga lut mi 84 an ni.