Minister Rinpuii'n Widow Cell a hawng

Women and Child Development depart-ment-in Widow Cell an din thar chu nimin khan Social Welfare and Tribal Affairs, Women & Child Deve-lopment (SWTAWCD) minister Lalrinpuii'n a pisaah a hawng.

Wiodow Cell hawnna inkhawm hi SWTAWCD secretary Lalzarmawii'n a kaihruai a; minister Lalrinpuii chuan, National Human Rights Commission-in state tinte chu Widow Cell din tura thurawn a pek thu sawiin, "Min rawn ti lui lo a, thurawn erawh min pe a, ṭul kan tih avangin kan din ta a, hmasawnna thar a ni," a ti.

Widow Cell chu One Stop Centre behchhana din a nih thu sawiin Lalrinpuii chuan, "A tum ber chu hmeithaite hmasawnna tura kawng hrang hranga hmalak leh hmalakna awm sate tihchangtlun a ni," a ti a; Mizorama district tina One Stop Centre-ah Widow Cell chu din a nih thu a sawi.

SWTAWCD Minister chuan, Mizo pi leh pute hun laiin hmeithaite dinhmun a ṭha lo hle a, tunlai thleng pawhin en hniamna a la awm thu a sawi a, "Hmeitheite hi an duh vanga hmeithai an ni lo a, hmeithai chhan hrang hrang a awm thei. A bika enkawl ngai, Pathian pawhin a bika enkawl tura a tih an ni a, Pathianin a humhalh bikte an nih angin kan lo tiduhdah tur a ni lo a, khaichhuah kan tum tur a ni," a ti.

Hawnna inkhawmah hian Women & Child Development director Zoramthangi Chhangte-in Widow Cell din dan leh hmalak dan tur tlangpui a sawi a; hmeichhe pawl hrang hrang aiawhte an tel a ni.