Damdawi-in pali-in NQAS an hmu thar; Damdawi-in 13-in NQAS an hmu tawh

Mizoram sorkar hnuaia damdawi-in pali - Siaha District Hospital, Lawngtlai District Hospital, East Lungdar Primary Health Centre (PHC) leh Phuaibuang Primary Health Centre te chu India rama sorkar damdawi-in ṭha thlan zingah an tel thar. Hengte nen hian Mizorama sorkar damdawi-in 13-in NQAS an hmu tawh.

Health & Family Welfare department hnuaia National Health Mission (NHM) aṭanga thu dawn danin, India rama sorkar damdawi-in ṭha tehna, National Quality Assurance Standards (NQAS)-ah damdawi-in palite hi an tling thar a ni.

A hmain damdawi-in pakua - Aibawk PHC, Thingsulthliah PHC, Civil Hospital Aizawl, Lunglei Civil Hospital, Champhai District Hospital, ITI Veng Urban PHC, Chawlhhmun Urban PHC, Haulawng PHC leh Sialhawk PHC-te an lo tling tawh bawk.

NQAS-a tling tur hian state level leh national level-ah tehna hrang hrang paltlang a ngai. NQAS-a tling thar damdawi-in palite'n tehnaah point an hmuh dan chu - Siaha District Hospital-in 92.53%, Lawngtlai District Hospital-in 88.08%, East Lungdar PHC-in 89.29% leh Phuaibuang PHC-in 84.23% a ni.

Siaha District Hospital hian damdawi-in puma NQAS an hmuh bakah, India rama nau neihna hmun ṭha bik leh inzaina hmun ṭha bik tehna LaQshya certificate an hmu tel. LaQshya-ah hian platinum certificate an dawng pha a, naupang damlo enkawlna hmun ṭha bik tehna MusQan-ah pawh an tling a ni. Lawngtlai District Hospital-in hian LaQshya certificate an hmu tel bawk.

NHM, Mizoram chuan India rama sorkar damdawi-in ṭha bik thlan chhuah zingah Mizorama damdawi-in an tlin belh zel chu HFW department leh Mizoram tan méllung pawimawh a nih thu te, thawktu zawng zawngte thawhrimna leh taimakna chhuanawm an tih thute an tarlang.