KHAWTHLIR

Kuhva rah man

Assam Rifles chuan January 8, Nilaini khan Mualkawi, Champhai district-ah ram dang aṭanga dan loa lak luh kuhva rah kg. 28,560 an man a, Champhai Vengthlangah ram dang meizial bâwmpui 31 an man bawk. Kuhva rah leh foreign cigarette mante hi dan anga bawhzui turin Champhaia Customs Preventive Force hnenah an hlan a ni. Kuhva rah an man chu cheng nuai 199 hû a ni a, meizial an man chu cheng nuai 40.30 hu a ni thung.

Minister-in hmanpui

Minister of state Prof. Lalnilawma chuan nimin khan a bial chhunga Keifang GSA Golden Jubilee puala 48th Keifang Local tournament khârna hun a hmanpui. Minister chuan, Mizo ṭhalai tam tak ruihhlo bâwihah an tâng tih sawiin, infiammite chu ruih theih thilah an insûm ṭhin avangin infiam lam uar turin kal khawmte a chah a; khawtlang hruaitute chu khawtlang mamawhte a hnena thlen zel turin a chah bawk.

Bazar thian fai

Sobji Bazar Auto Welfare chuan nimin khan Krismas leh kum thar vuakveta Lunglei Sobji Bazara hnawmhnawkte hnatlangin an tifai. Hnatlangah hian Sobji Bazar Auto Welfare member ṭhahnem tak an thawk chhuak a ni.

Sahuan tlawhpui

ASEP leh Solomon's High School chuan nimin khan Aizawl Zoological Park an tlawh. ASEP hruaitute leh Aizawl Sahuana thawkte'n nungcha humhalh chungchang zirlai naupangte an zirtir a; Mizoramin hausakna a neih hlu ber pawl environment leh nungcha humhalhna kawngah theihtawp chhuah turin an fuih.

Republic Day lawm dan tur rel

Serchhip DC Paul L Khuma hoin nimin khan DC hall-ah sorkar hotute, Assam Rifles, BSF, khawtlang hruaitute leh tlawmngai pawl aiawhte'n Republic Day hman dan tur an sawiho. Republic Day hi Serchhip Sports Complex-ah zing dar 7:30-ah lawm a ni ang a, DC chu khuallian a ni ang.