Hmarchhak state-te tan hmasawnna tam tak kan thlen - Tribal Affairs Minister

Union Tribal Affairs minister of state Durgadas Uikey chuan, BJP-in sorkar laipuiah kum 2014 aṭanga sorkarna an siam hnuah tun hmaa sorkar laipuia sorkarna siamtute'n an ngaihthah hmarchhak state-te tan hmasawnna tam tak an thlen tawh niin a sawi.

Durgadas Uikey hian nimin khan Hotel Regency conference hall-ah thuthar thehdarhtute a kâwm a; hmarchhak state-te chu tun hma chuan sorkar laipuiin a ngaihthah ṭhin nia sawiin, "Kum 2014 aṭanga BJP kan sorkar hnuah erawh nasa taka tuamhlâwm a ni a, inkalpawhna kawngpui, ei leh bar, zirna leh hriselna kawngah hmasawnna tam tak hmuh tur a awm tawh bakah, tribal mite a ngaihsak hle a ni," a ti.

Tribal Affairs Minister chuan, tuna India President chu tribal mi a nih thu te, Governor pathum leh sorkar laipuia minister pariat pawh tribal mi an nih thute a sawi.

Ministry of Tribal Affairs aṭanga sum hmuh hmanga Aizawl Tlangnuama Eklavya Model Residential School (EMRS) sak mek a tlawh thu leh thawktute chu a hun takah sa zo tura a chah thu sawiin Durgadas Uikey chuan, "Sorkar laipui chuan state hrang hrangah EMRS 728 a sa. EMRS-te hi tribal mite tamna hmuna tribal naupangte'n zirna ṭha an dawn theihna tura sorkar laipuiin a duan a ni," a ti.

Tribal Affairs Minister chuan, EMRS chu India rama tribal naupangte’n zirna ṭha zawk an dawn theihna tura duan a nih angin a ngaih pawimawh thu a sawi bawk.