MLA-in tui lakna siam mek a tlawh

East Tuipui bialtu MLA Ramthanmawia chuan January 8, Nilaini khan a bial chhunga Farkawn Water Supply Scheme (solar pumping) siam hna thawh mek a tlawh.

Ramthanmawia hian tui pump-na tur hmun buatsaih mek bakah Ṭiau luia tui lakna tur hmun a tlawh a; ramngaw chereu zela harsatna langsar tak chu kan tui lak hnâr kang zel chu a nih thu sawiin, "Tun hmaa gravity-a tui lak kan khamkhawp viau ṭhin kha tunah chuan tui haw tur a awm mumal ta lo a, ka bial khaw hrang hrang pawhin tuiah harsatna kan tâwk nasa em em a ni," a ti.

East Tuipui bial chhunga khaw tam takin Jal Jeevan Mission (JJM) hmanga tui lakna siam an chhawr laiiin, Farkawn chuan an khamkhawp loh thu a sawi a, "JJM hmangin cover theih a ni tawh si lo a, fund dang remchang zawngin theihtawp kan chhuah," a ti a; sorkar hmasa hun laiin NABARD RIDF XXVIII aṭangin fund an hmuh thu a sawi.

Farkawn Water Supply Scheme (Solar Pump) hi NABARD RIDF XXVIII hnuaia thawh niin, Exelsoirs Merchants-in an thawk a; sum ruahman chu vbc. 15 niin, Ṭiau lui tui lak tur a ni. Hna thawh tur zinga 85% zawh a ni tawh a, March 2025-ah zawh tura ruahman a ni.