Jan Suraksha Schemes Campaign sawiho

Kolasib District Consultative Committee on Campaign for Jan Suraksha Schemes at Gram Panchayat chu nimin khan bawrhsap Robert C Lalhmangaiha hoin an ṭhukhawm a, hmalaknate an thlir let.

Robert C Lalhmangaiha chuan, District Consultative Committee member-te chu mipui rawngbawltu an nih angin, sorkarin mipui tana hamṭhatna a ruahmante kawhhmuh leh hrilhfiah ngaite hrilhfiahtu an ni tih hre reng turin a chah.

Ṭhutkhawma tarlan danin, Kolasib district-a Jansuraksha Campaign hi Kolasib district-a bank 21-in an kalpui mek a; PMJJBY hnuaia campaign target achievement 865 chu 1,232-in an khûm tawh a, PMSBY hnuaia campaign target achievement 1,006 chu 1,385-in an khûm tawh bawk.

Tun dinhmunah VC 52-ah campaign kalpui a ni tawh a, campaign kalpuina tur VC pali la awmin, January 15, 2025 hmain campaign zawh hman an tum a ni.

Jan Suraksha Schemes Campaign-in a tum ber chu social security scheme pahnih - Pradhan Mantri Jeevan Jyoti Bima Yojana (PMJJBY) leh Pradhan Mantri Suraksha Bima Yojana (PMSBY)-a inziak lut tihpun leh VC tina campaign buatsaih a ni a; an hmalakna leh mapping tih tawhte chu Jansuraksha portal-ah dah luh a ni ṭhin.

Jan Suraksha Schemes Campaign hi Ministry of Finance hnuaia awm a ni a, October 15, 2024 - January 15, 2025 chhunga neih tura ruahman a ni.