Police-te'n hâlpuah/hâlmawi vangin mi 65 man, thubuai 56 ziak lut tawh

Kum 2024 Krismas leh kum thar 2025 vuakvêta Mizoram sorkarin hâlpuah leh a kaihhnawih thilte a khapna bawhchhia mi 65 man an ni tawh a, thubuai 56 ziah luh a ni tawh.

Mizoram Police hotute hnen aṭanga Vanglaini thu dawn danin, sorkarin kum 2024 Krismas leh kum thar 2025 vuakveta halpuah, halmawi, meithallâwn leh silai lem a mû kâp chhuak thei kawl, zawrh, hman leh hâl a khap kaihhnawihah Mizoram pumah thubuai 56 ziah luh a ni a, mi 76 man an ni tawh. Mi mante laka thubuai ziah luhna chu bail theih a nih avangin bail-in an chhuak hlawm.

Hâlpuah leh a kaihhnawiha sorkar thupek bawhchhiate chu Aizawl, Lunglei, Champhai, Kolasib leh Serchhip district-ahte man niin, thubuai siamsak an ni a; Siaha, Lawngtlai, Mamit, Saitual, Khawzawl leh Hnahthial district-ahte thupek bawhchhia man an awm lo.

Thubuai ziah luh 56 zinga 37 chu halpuah leh halmawi hâl thubuai a ni a, thubuai 19 chu kawl/zawrh vanga thubuai ziah luh a ni thung. Halpuah/halmawi hâl vanga thubuai ziah luh 37 chu Aizawl district-a mi vek a ni.

Krismas leh kum thar vuakvêta hâlpuah leh a kaihhnawih zuar/kawlte lakah thubuai 19 ziah luha man zawng zawng hlut zawng belh khawm chu Rs 24,12,128 a tling.

Sorkar thupek bawhchhia police-in an man tawhte chu thubuai siamsak an nih tawh bakah, chhui zui tura tih panga a la awm a, chhui zui ngaite chu Kolasib district-ah pathum, Aizawl leh Champhai district-ah pakhat ve ve a ni.

Police hotute chuan, chhui zui ngaite chu finfiahna video/thlalak aṭanga chhui a nih dawn thu leh, hmun ṭhenkhatah chuan an hâl ngei nia hriat, finfiahna tur awm si lote a awm thu an sawi.