Tuialhthei phurh chhuah khap

Lunglei district magistrate Navneet Mann thupek chhuahin, phalna nei loa Lunglei district aṭanga tuialhthei phurh chhuah khap a nih thu a tarlang. Thupek zâwm lote chu The Petroleum Act, 1934 Section 23 hmanga hrem theih an ni.

Navneet Mann chuan, tunlai hian Lunglei district chhungah phalna nei loa Myanmar leh ram danga hralh tur tuialhthei (petrol leh diesel) phur chhuak an awm tih hriat a nih thu a tarlang a, "Tuialhthei phurh chhuah phalna/storage licence nei loa tuialhthei phurh chhuah (deliver/dispatch) hi The Petroleum Rules, 2002 Rule 3 chuan a khap tlat a, dan zâwm lote chu na taka hrem theih an ni," a ti.

District Magistrate chuan, "Lunglei district huam chhungah tuialhthei indaih lohna a thlen loh nan te, mipui (consumer)-te'n harsatna an tawh lohna tur leh tuialhthei phur lirtheite'n chhiatna (kâng) an tawh loh nan storage licence nei lote'n filling station/petrol pump aṭangin emaw, hmun dang aṭangin district pawna hralh chhuah tur tuialhthei an la chhuak tur a ni lo," tiin a tarlang.