Aizawlah curfew puan a nih vangin IPC hnuaiah thubuai a tlahniam

Aizawl superintendent of police (SP) C Lalruaia chuan, Covid-19 léng laka invènna atan Aizawl Municipal Corporation (AMC) huam chhungah zan lam leh Pathianniahte chhuah phal a nih loh avangin Indian Penal Code (IPC) hnuaia thubuai ziah luh a tlem phah thu a sawi.

Vanglaini palai zawhna chhangin C Lal­ruaia chuan, IPC hnuaia thubuai ziah luh a tlakhniam rualin, Mizoram Liquor Prohi­bition (MLP) Act hnuaia thubuai ziah luh erawh chu a pung tih a sawi a, "Rangvamual thlen hma deuhah ṭum danga kan tih ngai loh angin duty kan indah a, hei hian MLP Act hnuaia thubuai ziah luh a tipung hle. Curfew bawhchhia man tur pawh an awm zeuh zeuh," a ti.

Aizawl SP sawi danin, curfew vangin thubuai ziah luh zat tlem phah lutuk angin lang lo mah se, thubuai ziah luh tamna ber ṭhin ILP hnuaia ziah luh chu a tlahniam. Ṭum danga thubuai an ziah luh tam lutuk lohna MLT Act hnuaia thubuai ziah luh pun avang leh thubuai an ziah luh ngai lohna curfew bawhchhiat thubuai an ziah luh avangin thubuai ziah luh zat a tlakhniam tam loh phah a ni.

Kumin Krismas leh nakkum  kumthar vuak­vêtah hâlpuah, hâlmawi, meithallâwn leh silai lem (a mû nei chi) khapna thupek khauh taka an kenkawh dawn thu sawiin C Lalruaia chuan, "Nikum dinhmun kan zir chianna aṭangin online hmanga chah a tam tih hriat a ni a, hei vang hian OC-te'n an area ṭheuha online shopping agent-te biain, phal loh thil chah an awm chuan anmahni hriattir zel turin an hrilh," a ti.

Aizawl SP sawi danin, nikum Krismas leh kumthar vuakvêtah khan hâlpuah, hâlmawi leh silai lem kaihhnawihah thubuai pakua ziah luh a ni a, thubuai paruk chu Court-in thiam loh a chantir a ni.