Vbc 1,405.26 hû water transport project zingah Mizoram chan tur vbc. 12.1 a tel

Transport minister Vanlalhlana chu nimin khan Kaziranga, Assam-a 2nd Inland Waterway Development Council ṭhutkhawmah a tel a; state leh union territory hrang hrang tana cheng vbc 1,405.26 hû project kalpui tur hawn zingah Mizorama kalpuina tur cheng vbc. 12.1 hù a tel.

Ṭhutkhawm hi Union Ports, Shipping and Waterways minister Sarbananda Sonowal leh Assam chief minister Himanta Biswa Sarma ten an kaihruai a; Inland Waterway Authority of India (IWAI) hmalaknate tarlan niin, state 21 leh union territory-te tan cheng vbc 1,405.26 hû project hawn a ni.

Project hawn zingah hian Mizorama inland water transport project kalpuina tur cheng vbc. 12.1 a tel a; Tlawng lui leh Chhimtuipui luia IWT project leh Khawthlangtuipui-Tuichawng inkara IWT project-te a ni.

Vanlalhlana chuan, Mizoram chu tlang ram a nih avangin mihring leh bungraw phurhna kawngah harsatna an awm ṭhin thu a sawi a, "Inland water transport changtlung tak hmangin heng harsatnate hi thui tak sutkian theih a ni ang. Mizoramah lui lian tam lo mah se, a awm chhunte ṭangkai taka hman a nih chuan inkalpawhnaa harsatna leh zin mite phurrit eng emaw chen chhâwk zângkhai theih a ni," a ti.

Transport Minister chuan, Mizoramah Inland Waterway Development hnuaia hmalak a nih chuan a ram leilung mite hlâwkpuina tur ruahmanna siam ngaih pawimawh ni se a duh thu leh, Inland Water Transport subject chu Transport department kutah kum 2019 khan dah ṭan chauh a nih thu sawiin, a remchan dan ang anga bawhzui reng a nih thu a sawi.

Tuirial Hydel Project thukhuah chungchang sawiin Vanlalhlana chuan, mihring leh bungrua phurh nan leh river cruise tourism kalpuina atan hman theih a nih thu a sawi bawk.

Inland Waterway Development Council ṭhutkhawmah hian Transport secretary Zosangliana leh director R Lalrammawi te pawh an tel a ni.