KHAWTHLIR

Missionary Day

Vawiin January 11 hi Mizorama missionary hmasa ber pahnih Rev. FW Savidge (Sap Upa) leh Rev. JH Lorrain (Pu Buanga) ten kum 1894-a Mizoram leilung an rah ni, Missionary Day a ni a, kohhrante'n an lawm dawn. Missionary Day hi BCM kohhrante chuan uar takin an lawm dawn a, tualchhung kohhran ṭhenkhat chuan ruai nen an lawm dawn nia thu dawn a ni. Mizoram Presbyterian Kohhran chuan January 11 hi Mizoram Presbyterian Kohhran din ṭan ní angin an hmang dawn a, thupui atan chhûn lamah 'Chanchin ṭha leh kohhran' tih leh zanah 'Hei leh chen hi Lalpa'n min pui a ni' tih an hmang ang.

Induction service

Mizoram Presbyterian Kohhrana pastor leh probationary pastor, kumina awmna sawn turte chu naktuk Pathianni chawhnu hian an awmna tharah lak luhna inkhawm, induction service neihpui an ni dawn. Pastor 80 leh pro. pastor 26 induction service buatsaih tur niin, Synod puipate leh pastor pension tawhte'n pastor bial hrang hrangah an neihpui dawn a, Synod moderator Rev. RC Lalnghakliana chuan Champhai Vengsang Bialah a neihpui ang.

Chetsualnaah thi

Lalmalsawma (39), Tuikhuahtlang chu December 9, Ningani khan lirtheiin a sut avangin a thi. Vanglaini thu dawn danin, Lalmalsawma hi Champhaia an chhungte inneihnaah a kal a, a thlenna Circuit House kawta a ding lai chu lirtheiin a sú a, ká chhawn lohin a thi. Vawiin chhun dar 12-ah vui a ni ang.

Kawng hawng

Vaphai leh Chawngtui East inkar kawng chhuat phah thar chu January 9, Ningani khan East Tuipui bialtu MLA Ramthanmawia'n a hawng. Kawng hi SASCI 2023-24 sum fund hmanga siam niin, PWD Champhai Division-in an thawk a, blacktop thui zawng chu km. 3.4 a ni a, hume pipe culvert pathum siam a ni bawk. MLA Ramthanmawia hian Chawngtui East-ah hian a MLA fund hmanga siam feh kawng, Dilkawn-Thilte Fartlang Agriculture Link road a hawng bawk.