Intuai hriam zel turin LRS-a thawkte chah

Land Revenue & Settlement (LRS) department chuan nimin khan an hnathawh thlir letna hun, LRS Expert Conclave: One Day Review Meeting an hmang a, LRS minister B Lalchhanzova'n hmanpuiin, intuai hriam reng turin thawktute a chah.

B Lalchhanzova chuan, LRS department-a thawkte chu sûlhnu felfai leh entawn tlak nei tura inzir peih tur leh intuai hriam reng turin a chah a, "Department-a kan mawhphurhna ṭheuhah mi rintlak leh râwn tlak ni thei turin kum bul aṭanga ṭan kan lak a ṭul," a ti.

Thil dik tâwk lo, chinfel ngai nia hriatte chu mi dangin an en liam ṭhin vang maia hmu lo dertu nih ve zel chu buaina leh harsatna lian zawk thlentu a nih fo thu sawiin Minister chuan, "Thil ṭha ti tur chuan buai leh mualpho ngama hma latu nih kan tum tur a ni. Ram teh leh felfai taka chhinchhiah hna kalpui chungchangah mipuiin kan lakah beiseina sang tak an nei a ni," a ti a; mipui beiseina tihlawhtlin chu an mawhphurhna a nih thu a sawi.

B Lalchhanzova chuan, LRS department chu dàwrtu ngah an nih avangin dàwrtute lakah hlim hmél pu tur leh hawihhâwmna chhawm nung zel turin department-a thawkte a chah a, "Hnathawhna hmun hi kan rinna fiahna hmunah hmangin, taimakna, rinawmna leh mi dang tana malsawnna thlentu kan nih theihna hmunah kan siam ṭhin tur a ni," a ti.

Revenue Minister chuan, LRS department tihchangtlun zel nan Champhai leh Mamita district pisa sakna tur cheng vbc. 4.68 leh vbc. 4.5 chu Special Assistance to States for Capital Investment (SASCI) hnuaiah hmuh a nih thu a sawi bawk.

Review meeting hi LRS secretary Vanlalmawia'n a kaihruai a, Secretariat, Directorate leh district hrang hrang pisaa officer-te an tel. Tax & Non-Tax Revenue leh Stamps & Registration tih thupui zirho a ni a; district tina hnathawhnate thlirho a nih bakah, thil pawimawh dangte inhrilhfiah a ni.