Hma lam pan a pawimawh - BJP President

BJP, Mizoram Pradesh chuan Aizawla an pisa chu nimin khan kumin 2025 atan an hawng a; an presient Vanlalhmuaka chuan, an awm dante Central-in an hmua an thlir reng a ni tih hriaa hma lam pan a pawimawh thu a sawi.

Vanlalhmuaka chuan, "Politics tak tak, ram hmasawnna leh ṭhatna ngaihtuah chungin Kristian state kan nih ang taka ring lo mite'n Zoramah hian Kristianna dik tak a thlen a, Central emaw, kan chhehvela chengte hian kan awm dan an hmu a, min thlir reng a ni tih hre chunga hma lam pan a pawimawh. Kan thusawi aiin kan nun hian thu a sawi ring zawk a ni tih hre chungin kum 2025-ah hian hma ila ang u," a ti.

Mizoram BJP President chuan, "Kan lei hi kan ven ṭhat a ngai a, kan lei kan ven ṭhat chuan kan party emaw, kan state emaw hian kawng dik leh kawng ṭha zawk a zawh ang," a ti a; kum 2025 an chuang kai chu Pathian awmpuina leh hruaina vang a ni tih hriat a ṭul thu a sawi.

BJP MJA Dr K Beichhua pawhin thu sawiin, "Politics hi tute emaw khelh tur atan dah mai loin, kohhran mi, Pathian ṭih mi leh mi ṭha tak takte hian kan khelh a ngai a, chutiang kan nih loh chuan kan ram hian kawng dik kan zawh thei dawn lo. Mizoram kan hmangaih a nih chuan kohhrana kan mi ṭha leh hming ṭha tak takte hian páwn lam aṭanga min thlir mai loin, BJP-ah ngei lo zuang lut u la, BJP ṭha kan din ang a, Mizoram hian ram hmangaihtu ṭha nei mai dawn a ni," a ti.

Dr K Beichhua chuan, Mizoramah sum lêng vel a váng nia sawiin, "Sum a vàn chuan a mawhphurtu sorkar a ni. Sorkar ber a retheih chuan sum lêngvâk a tlem a, miretheite'n kan tawrh phah a, eichawp kan dapna thlengin a tawrh phah ṭhin," a ti a, sorkarin sum a neih a ngaih thu a sawi.

Thusawitu dang BJP State Core Group member Lalrinliana Sailo chuan, Mizorama sorkar mekin kum kal mekah OMB hmangin cheng vbc. sang têl a pûk a ngai chu mak a tih thu a sawi a, "An sorkar hmaa páwn lam aṭanga en ang ngawt a nih lohzia tunah chuan an hre ve tawh turah ngai ila, Mizoram hmasawnna tur hian eng nge pawimawh a, tute nge pawimawh tih kan ngaihtuah tel a ngai, Mizoram hian hmangaihtu tak tak kan neih a ngai," a ti.