KHAWTHLIR

Mizoram Legislative Assembly hnuaia Public Account Committee (PAC) chairman Lalduhoma chu MLA aṭanga a chawlh tâk avangin, Assembly Speaker chuan PAC chairman atan ZPM Legislature Party deputy leader Vanlalhlana a ruat thar.

Rev. Dr C Lalhlira, Mission Veng bialtu pastor-in Pathian thu (sermon) a ziahte KṬP, Mission Veng Branch-in a bua an siam, 'Inkhung lai thuchah bu 2-na' chu nizan khan KṬP, Mission Veng Branch leader Lalrinchhana Ralte-in a tlangzarh. Rev. Dr C Lalhlira hian Covid-19 léng vanga kohhran inkhawm a awm loh ṭan tirh aṭanga tun thlengin ni tin Pathian thuchah a ziak ṭhin a; lehkhabu hi phek 384-a chhah, Rs. 250 man a ni. Nimin vêk khan Rev. Lalsangbera lehkhabu ziah 'Hmabak êng chhungkua' tih chu Lengzem editor Vanneihtluanga'n a tlangzarh bawk a; phek 193-a chhah, Rs. 150 man a ni.

Serchhip DC chuan nimin khan thupek chhuahin, Covid-19 avangin Serchhip khawpui chhunga vantlang hmunah leh hnathawhna hmunah mi panga aia tam punkhawm a khap.

Chawngte football ground-a phûl lem (astro turf) phah bul ṭanna tur lungphùm chu nimin khan Sports minister Robert Romawia Royte-in a phúm. Phûl lem phahna atan hian  Ministry of Minority Affairs aṭang cheng nuai 532.50 hmuh a ni a, first instalment cheng nuai 239.62 chu Mizoram sorkarah pek a ni tawh.

State Referral Hospital-ah Covid-19 vei mi 22 an awm mek a, an zingah kum 60 chung lam pali leh kum 14 hnuai lam pathum an tel. SRH-ZMC Bulletin tarlan danin, Mi 22-te chu Isolation ward-ah an awm a, ICU-a awm an awm lo; mi pali chu oxygen pek mek a ni. SRH aṭang hian nimin khan enkawl dam tawh mi pathum chhuahtir an ni.