TIPM hruaitute'n sorkar hotute an hmu

Thangram Indigenous People's Movement (TIPM) hruaitute chuan MZP hruaitute kaihhruaiin December 2, Nilaini khan chief minister Zoramthanga, Assembly speaker Lalrinliana Sailo leh Rajya Sabha MP K Vanlalvena te an hmu. TIPM hi Assam sorkar awpna hnuaia awm Zo hnahthlak pêng hrang hrang intél khawm an ni.

Chief Minister an hmuhnaah TIPM hruaitute chuan, kum 300 chuang Thangram hmunah Zo hnahthlak hnam péng hrang hrang mi 25,000 - 30,000 vel an chèn thu te, Assam sorkarin a rahbeh dan te, electoral roll-ah Assam sorkarin a thun duh loh dan te, anmahni huan lo ramah pawh an duh anga hna an thawh theih loh thu leh Assam sorkarin phût lêt an neih ṭhin dan te, electric current an la neih mumal loh thu te, sorkar hna lakah enhran leh hmuhsit an tawh dante an sawi.

CM Zoramthanga chuan, Thangram mipuite'n Mizoram sorkar hnuaia awm leh Mizorama beh an duh avanga Aizawl an thleng chu lawmawm a tih thu a sawi a, "Kan thinlungah inzawmna kan neih zel a, inzawm khawmna tura ṭan a pawimawh. Hun remchang hmasa berah cultural exchange neih a ṭul a ni," a ti.

Chief Minister chuan, Thangram mipuiin buaina leh harsatna te, ei leh bàra harsatna an tawhah a ṭul anga Mizoram sorkarin ṭanpui leh buaipui a inhuam thu a sawi a; Assam sorkarin an enkawl ṭhat lohna Zo hnahthlakte inunauna tinghettuah hmang a, Zofate insuih khawmna kawnga Pathian remruata ngai turin a chah. TIPM hruaitute hian CM hnenah memorundum an thehlut nghal a ni.

TIPM hruaituten hma an lâk zelna atan MNF party chuan Rs. 10,000 an pe a, Home minister Lalchamliana'n Rs. 7,000 a pe bawk.