AYUSH-in Yoga Day an hmang dawn SYS-in an hman loh tur thu Central an hriattir

International Day of Yoga, June 21-a hman tur chu Sports & Youth Services department chuan Pathianni a nih avangin an hman theih loh tur thu sorkar laipui an hriattir a; Health department hnuaiah AYUSH erawh chuan Pathianni zing karah hman an tum.

Tarlan tawh angin, Mizoram Kohhran Hruaitute Committee chuan June 17 khan thuchhuah siamin, June 21, 2015, Pathiannia International Day of Yoga hman tur chu ṭha lo an tih thu an puang a, Mizorama Kristian zawng zawngte chu International Day of Yoga hmang ve lo turin an ngen a ni.

Sorkar hotute aṭanga thu dawn danin, sorkar laipui chuan India rama state sorkar tinte chu International Day of Yoga hmang vek turin a hriattir a, Mizoram sorkar pawhin hriattirna hi a dawng ve a ni.

Health Services-a joint director (AYUSH) Dr C Lallunghnema chuan zawhna chhangin, International Day of Yoga hi hman an tum tih a sawi a; June 21 Pathianni zing karah Nehru Yuva Kendra (NYK)-te nen a tak (practical)-in an hmang dawn a, June 20 zanah Doordarshan Kendra, Aizawlah International Day of Yoga chungchang sawihona hun an hmang bawk dawn niin a sawi.

Hetih lai hian, Sports & Youth Services secretary Zothankhuma chuan June 16, 2015 khan sorkar laipuia Ministry of Youth Affairs & Sports under secretary hnenah lehkha a thawn a; kumina International Day of Yoga chu Pathianni, Kristiante ni pawimawh a nih avangin hman theih a nih loh thu leh an hman dawn loh thu a hriattir a ni.

School Education department hotute erawh chuan, International Day of Yoga hman leh hman loh turah thu mûm an nei lo a, an hman dawn leh dawn loh an la hre lo tih an sawi thung.

Vanglaini palai zawhna chhangin, MKHC hruaitute chuan, Yoga chu Hindu sakhua nena inzawm a nih thu leh ní (sun) pathianna leh pathian anga biakna a tel thu an sawi a; Yoga chu an la zir chiang zel dawn a, a ṭul anga an bawhzui zel dawn thu an sawi.

MKHC hruaitute chuan, Yoga chu Hindu sakhaw lehkhabua innghat tlat niin an sawi a, "Tun hnaia Governor kan hmuhnaah chuan Governor chuan Yoga Day hman hi tihluihna a nih loh thu leh hmarchhak state-te tan chuan ngaihhnathiamna a awm thu a sawi," an ti a, a; ni tin sikulah zir ngei ngei tura tih luih a nih loh nan hmalak an tum thu an sawi bawk.