KHAWTHLIR

Thisen pe
Thangi w/o V Thanga, Dawrpui, June 30, 2015-a thi hriatreng nan a tupa V Lalnunthara chuan nimin khan Aizawl Civil Hospital-ah blood donation camp a buatsaih a, thisen unit 9 an pe a, a petute mipa vek an ni.

RV-ah leimin
Rangvamual tawntirha NH-54 kawngpui chhaka lei min ṭhin chu Nilaini zan khan a min leh a, lirthei kal theih lohin kawngpui a hnawhping. Leimin hi nimin khan PWD-in an thian nghal a, tlai dar 3:30-ah lirthei chi tin kal theiha siam tlang a ni.

YMA leh SP
YMA sub-headquarters, Kolasib hruaitute chuan nimin khan Kolasib SP C Lalzahngoa chu a pisaah an kâwm. YMA hruaitute chuan SP hnenah hian ram leh hnam humhalh kawnga thawhho dan tur leh hnam dang truck kal vel Mizo hmeichhiate’n zin veivah nan an hmang tam lutuk an ngaimawh thute an sawipui a; ngawrh zawka ILP endik ṭhin turin an ngen bawk.

MJA Library pe
J Zahluna chuan a lehkhabu ziah, ‘Role of the opposition parties in the legislature’ tih chu MJA Public Library-ah a pe a; a chungah MJA-in lawmthu a sawi a ni.

Career guidance
Sport & Youth Services department buatsaihin National Progamme of Youth and Adolescent Development (NPYAD) chuan nimin khan Champhaia high school hrang hrangah career guidance an nei a, Sports director Zothanmawia’n a hmanpui.

Chhiah lâk titawp
Aizawl Municipal Council-in June 16, 2015 aṭanga Aizawl khawpuia Property Tax a lak chu mipui aṭanga sawiselna a awm avangin nimin aṭang khan chawlhsan lailâwk a ni. Thudawn danin, ram ruak aṭanga chhiah lak chu a sang lutuk tia sawiselna a awm avangin titawp lailawk a ni a, June 29, 2015-a Board of Councillor meetingah kalpui zel dan tur rel a ni ang.