Bank account hralh vanga khawih chêt theih loha dahsak an awm nual tawh

State Bank of India (SBI) hotute chuan, Mizoramah bank account khawih chêt theih loha dahsak (hold) an awm nual thu leh, account khawih chêt theih loha dahsakte chu a tlangpuiin mi dang hnena account hralh an nih thu an sawi.

SBI Aizawl Main Branch-a deputy manager F Lalchhanhimi chuan zawhna chhanga a sawi danin, Mizoram pawna lehkha zir tam takin Mizorama an haw dawnin account an hralh ṭhin a, chu chu misualin mi dang bum nan an hmang leh ṭhin a ni. Police-in an chhui zui hnuah account neitu an chhui thleng a, a tira account neitu kha mawhphurtu a nih ṭhin avangin Mizote zingah bank account hralh vanga thubuai nei an awm nual tawh a ni.

F Lalchhanhimi chuan, bank account chu hralh chhawn phal a ni lo a, an hralhnate'n thil sual tih nan an hman leh ṭhin avangin bank account hralhtu chuan hremna chi hnih an tuar thei tih a sawi a; mi tinte chu bank account hralh chhâwng lo turin a chah.

SBI deputy manager chuan, New Delhi, Bangalore, Chennai, Hyderabad, Kolkata leh Mumbai khawpuia police-te hnen aṭangin bank account khawih chêt theih loha (hold) dah turin ngenna an dawng tam tawh viau niin a sawi a, "Mizoramah pawh bank account hawn tír a, Rs. 2,000 vela leisak a, cyber crime lama inhnamhnawihte hnena hralh leh ṭhin nu pakhat a awm a, police-ah thlen a ni tawh a, mahse tun thlengin an la man lo niin kan hria," a ti.

SBI deputy manager sawi danin, Face­book leh phone message hmangin thil dawng tur ang te, rokhawm tur angtein hriattirna dawng an awm ṭhin a; chumi hnuah an thil dawn tur khul chhuah nan pawisa deposit turin an ti a, bank account an lei number chu an hrilh leh ṭhin a ni.

F Lalchhanhimi chuan, SBI-in an cus­tomer-te account number leh ATM PIN number-te an dil ngai lo tih sawiin, mipuite chu an bank account number leh TMA PIN-te mi dang hrilh lo turin a chah a ni.