Muanna Veng thlanmual minah thlan 27 chhia

Nimin zing dar 7 vel khan Muanna Veng thlanmual a min a, thlan 27 a chhia. Lei minna hmun hi tun hnaia an inphûmna lam a ni.

Muanna Veng khawtlang chuan an thlanmual minah hian nimin khan an hnatlang nghal a, thlan chhia aṭangin ruang/ruhro 17 an la chhuak hman niin Branch YMA secretary Lalrinkima chuan a sawi. Hnatlangah hian Muanna Veng mite bakah, Zuangtui, Ṭhuampui leh Muthi aṭangin mi ṭhahnem tak an thawk chhuak a ni. Ruang leh ruhro lak chhuah hnatlang hi vawiinah an chhunzawm leh ang.

Muanna veng thlanmual min hi nimin khan bialtu MLA Lalrinawma, deputy speaker-in a tlawh a, a ṭul ṭula hman atan silpauline 18 a pe. Bialtu councillor Lalrinenga, Aizawl SP Laldina leh Central YMA hruaitute'n an tlawh bawk.