Sorkar hna vanga hausate chu An eiru tihna a ni: Ngunlianchunga

Animal Husbandry & Veterinary minister C Ngunlianchunga chuan, sorkar hna avangin a hausak theih loh tih sawiin, “Sorkar hna vanga hausa an awm a nih chuan an eiru tihna a ni mai,” a ti.

Pig Producers’ Co-operative Federation (PIGFED)-in nimina AH&Vety conference centre-a General Assembly an neih a hmanpuinaah thu sawiin C Ngunlianchunga chuan, “Sorkar hna hian mi zawng zawng a daih lo a, mahnia din chhuah tum a pawimawh,” a ti a; sorkar hna kher lo din chhuah theihna tur hna dang tam tak a awm thu a sawi.

AH&Vety Minister chuan, ram dang aṭanga vawk chi ṭha la lut turin theihtawp an chhuah zel dawn tih sawiin, “Vawk chi ṭha kan lak luh hunah chuan district tinah kan dah ang. Vawk vulh hi tihhmasawn zel kan tum a, a market-ah buaina a awm lo,” a ti.

C Ngunlianchunga chuan, AH&Vety department farm hrang hrangte tihtawp mek a ni tih sawiin, “Farm hi tihtawp zel a ni ang. Sorkar tan chuan a buaithlak. Demonstration atana farm siam hi a tawk tawhin kan hria a, kum 40 chuang kan kalpui tawh a ni,” a ti a; ram changkangah chuan sorkar farm din hmuh tur a awm ngai loh thu a sawi.

AH&Vety director Dr LB Sailo chuan khawvela vawk chi ṭha bik lak luh vek an tum tih sawiin, “Vawkah hian intodelh mai ni loin, hmarchhak state châwm theih kan tum a ni,” a ti.

PIGFED General Assembly hi an chairman F Zosanga’n a kaihruai a, chawhnu lamah ro an rel a ni.