Tui pump kháwl thar bun

Lunglei khawpui tuia châwmtu Pialthlengah tui pump-na kháwl, diesel engine leh pump thar cheng nuai 217.54 man chu nimin khan bun ṭan a ni. 

PHE department hotute sawi danin, kháwl thar hi power supply awm loh vanga tui pump khaihlak ṭhin sutkian nana tih a ni a; sum awm sa awm lo mah se, Lunglei mipui mamawhna a san avangin a báin an la a ni. Chawlhkar thum hnu velah bun zawh theih tura beisei a ni a, hman theih a nih hunah chuan darkar khatah tui litre 2,23,000 a pump thei dawn a ni.

Tun dinhmunah Lunglei khawpuiin ni tin tui litre nuai 50 a mamawh a, chutih laiin PHE chuan ni khatah litre nuai 30 vel bak an pe thei lo. Greater Lunglei Water Supply Scheme hman mek chu mi 66,000 châwm tâwk tura buatsaih a nih laiin, tunah chuan mi 1,30,000 vel châwm mek a ni.