Education dept.-in an minister hoin Zirna kalphung thar tur an sawiho

Sorkar laipuiin New Education Policy a duan tur chungchangah nimin khan School Education department chuan Berawtlanga Art & Culture auditorium-ah inràwnkhawmna hun an buatsaih a, School Education minister H Rohluna’n a hmanpui.

Minister H Rohlun­a chuan, department hmalakna hrang hrangah thawhhona ṭha tak department hotute nen an nei thei nia sawiin, lawmawm a tih thu a sawi a; thawhhona ṭha neih zel a beisei thu leh thawktute’n an mawhphurhna ṭheuh an hlen dan inenfiah fo turin a chah.

Zirtirtu indaih lohna awm ṭhin chungchangah H Rohluna chuan, “Voluntary retirement Scheme hnuaiah zirtirtu 60 la leh tura ruahman mek a ni a, a lak hna chu MPSC kuta dah a ni tawh. Zirtirtu lak belh tur hian zirtirtu indaih lohna awm ṭhinte eng emaw zat a phuhrûk theih ngei ka beisei,” a ti.

School Education secretary Manisha Saxena pawhin thu sawiin, “Consultation meeting on New Education Policy hi khawvel ṭhang zelah zirna atana ṭangkai tak tur a ni,” a ti ;, meeting-a telte chu an thil hriatte hman ṭangkai tum turin a chah.

Meeting-ah hian School Education department hnuaia officer-te an tel a, School Education director K Lalthawmmawia’n a kaihruai.

School Education hotute sawi danin, kum 1986-ah National Policy on Education duan a ni a, chu chu kum 1992-ah siam danglam a ni. Chumi hnuah zirna kalphung ennawnna atan vawi eng emaw zat tihdanglam a ni tawh. National Policy on Education chu kum eng emaw zat hman a nih hnuah, National Education Policy duan leh a ni a; zirna tihdanglam leh zir zau zelna atante mipui mamawh danglam zel phuhru tur zawnga a duan a ni.

Consultation meeting-ah hian SCERT joint director pahnih Laldawng­liani Chawngthu leh D Ramdinthangi, deputy director Zothanmawii, School Education deputy director Lalhmachhuana, SCERT special education officer Sangzuali Vanchhawng leh, ICT department-a mithiamte’n New Education Policy nihphung an sawifiah.