Khakchangpara-ah Mizorama kîr duh awm lo

Tripura-a Khakchang­para camp-a Mizorama let tur Bru endiknaah nimin thleng khan inenfiahtir an awm lo a, Mizorama kîr duh an awm lo. Nimin kha Khakchabngpara camp-a Mizoram Bru enfiah ni hnuhnung a ni.

Thu dawn danin, Khakchangpara camp-a Bru hruaitute chuan nimin khan 'Mipui Aw' tia thu chhuah siamin, an thil phût chi hrang hrangte chu anmahni endik tura kal, Mamit SDC Victor Lalawmpuia hnenah an thehlut a ni. Lehkhaah hian mi 21-in hming an ziak.

Mizoram Bru Displace People Forum, Khakchangpara branch secretary BP Chorkhy sawi danin, lehkhaa an thil phût an ziah lan zingah - an awmna hmun thar turah chhung­kaw tin tan ram pek te, khaw khatahchhungkaw 500 aia tlem loa dahkhawm te, khaw lian deuh deuha awm khawm te, anmahni venghim turin Central paramilitary force rawih te, IAY ṭanpuina pekte a tel.

Kasmir Pandit leh Tamil refugee-te pek zat ṭanpuina pek te, anmahni enfiahna turin kum 1995 electoral roll hman loh te, Ministry of Tribal Affairs hnuaiah Primitive Tribal Group anga awm a, a bika anmahni enkawlna siamsak te, an puala Permanent Development Project siamsak te, kum hnih chhung a thlawna ration pekte an phût bawk.

Khakchangpara-ah hian Mizorama kîr duh an awm loh avangin enfiah tura kalte chuan nimin chawhnu dar 3 hnuah Khakchangpara aṭangin Kanhmun an pan. Home department ruahman lâwk angin, Hamsapara camp-a Bru, Mizorama kir duhte chu kumin June 29 leh July 2 inkarah enfiah tur a ni a, lak let tur an awm chuan July 6-10 chhungin lak let an ni ang.