MZP-in Tlabung SBI pisa an dang

State Bank of India (SBI), Tlabung Branch-a internet ṭha lo tih ṭhat phûtin MZP sub-headquarters, Tlabung chuan nimin khan bank hnathawkte pisa kai tur an dang.

Tlabung aṭanga thu dawn danin, Tlabung SBI-ah internet a ṭhat loh avang hian mipuiin harsatna an tâwk nasa hle niin an sawi a; internet tiṭha thuai tura SBI phut nan nimin khan thawktute pisa kai tur an dang ta a ni. Tlabung SBI hotute chuan internet ṭha lo vanga mipui harsatna sutkian a nih theih nan an hotu lute hnenah thlen an tum thu an sawi avangin picketing chu chawhma dar 10:30-ah tihtawp a ni.

Tlabung MZP-te chuan, Tlabung SBI chu Tlabung leh a chhehvel khaw 30 chuanga mipuiin an hman a nih thu leh, chawhrualin, ni tin mi 100-150 velin an dawr ṭhin thu an sawi a, “Kar khat chuang internet ṭhat loh vangin pawisa dah leh la chhuak turte’n harsatna nasa tak an tâwk a ni,” an ti.

Tlabung MZP chuan, Tlabungah ATM booth pakhat tal dah te, SBI manager nghet dah an phut thu te, eizawnna bul ṭan duhte tana loan pek chhuahah tun aia inhawng zau turin an phût bawk.